قراءتى للاحداث

      الاخوان فى مصر متنرفزون، متعصبون ، مهمومون،....طبعا لان مصداقيتهم قدام حلفائهم فى الدول العربية على المحك...تونس بقت اخوانية وليبيا بقت اخوانية واليمن كمان..مفضلش غيرهم وهما الاعظم والاكبر ما بين قرنائهم فى الدول العربية ..طيب وبعدين؟؟؟...."تعمل ايه يا عبد الرحيم تعمل ايه يا عبد الرحيم...اه امشى ورا العسكر واعمل اللى بيعملوه واقول اللى بيقولوه...اكيد اكيد حيدونى الحكم وساعتها...هع هع هع ..هأعلن مصر دولة اسلامية واطير على قطر ابايعها بالخلافة..وطبعا حينوبنى حب وفلوس كتيييير .."
الاخوان بعد ما فقدوا قاعدتهم التصويتية من السلفيين ..بقوا زى الجريح بيضرب فى اى حتة فبقى يهدد العسكرى وعايز الوزارة ..طيب عايز الرياسة ..طيب الدستور ..طيب اى حاجة...
.لكن العسكر مش حيسلم للاخوان ...يسلملهم ليه ؟؟ماسكين عليه ايه؟؟ شوية فساد ..وايه يعنى ..المهم الشعب ..والشعب مع العسكر وخصوصا بعد ما بانت انتهازية الاخوان وسطحيتهم وانبطاحهم من ساعة ما خدوا البرلمان..واهم كوشوا على لجنة الدستور وبانوا انهم مكيافليين اكتر من مكيافيلى نفسه قدام الشعب كله...الشعب اللى شايف السلفيين ومراهقتهم السياسية وخايف من تاريخ الارهاب بتاعهم واهو بالدليل كان معاهم سلاح فى العباسية ضربوا اهالى العباسية و ضربوا الجيش...يفضل الشعب خايف ومرعوب من الاخوان الانتهازيين والسلفيين الارهابيين ويترمى فى حضن العسكر اللى بيدافع عن البلد...
العسكر عارف انتهازية الاخوان وطمعهم من اول يوم راح اتحالف معاهم ..ووفقلهم على التعديلات اللى عملوها باوامره ..واستغل قاعدتهم التصويتية من السلفيين انهم يضحكوا على الشعب الغلبان فى المساجد ب"نعم" وكانت الخيارة التى قضمها..."ال---" وكانت التعديلات فيها سم قاتل..
وبخبرة العسكرى المخابراتية عزل الليبراليين والاشتراكيين عن الطريق وشيطنهم ..لانهم الوحيدين اللى ممكن يدافعوا عن الاخوان لما يستفرد بيهم العسكرى..لكن خطة العزل ماكنتش كاملة فنزل بعض الشباب يتضامن مع السلفيين فى العباسية..وكان انذار العسكرى فى اليوم اللى قابله بضرب من يقترب من وزارة الدفاع كفيل ان الاخوان يترعبوا من سيناريو 1954 وميهوبوش ناحية العباسية وينزلوا التحرير هما وشوية من حلفائهم السلفيين ..ولعدم وجود الاخوان وكل السلفيين قدام وزارة الدفاع قرر العسكرى انه يضرب ويسرب ان اللى هناك كان معاهم اسلحة وان اغلبهم ارهابيين..
ليه العسكرى مبيضربش الاخوان ..لانهم ضمان لبقائه.. "مش عشان خايف منهم لا سمح الله ..ماهو ممكن يخلص عليهم فى ثوانى زى ما عمل فى المتظاهرين فى العباسية .." العسكرى بيستغل الاخوان وانتهازيتهم والسلفيين ومراهقتهم لترويع وترهيب الشعب المصرى اللى دلوقتى ممكن تلاقى منه عدد لا بأس به بيترحم على ايام مبارك..
نفس السياسة االمتبعة من مبارك ..هو الرئيس الوحيد اللى فى عصره نال الاخوان قطعة كبيييرة من التورتة ودخلوا البرلمان بالتحالف مع الحزب الوطنى ..واستغلها مبارك برضه فى اظهار انه لو مكنش هو.. يبقى الاخوان..
خلاصة القول ..الخطة المخابراتية العسكرية ماشية مظبوط مستغلة غرور الاخوان والسلفيين وغباء الليبراليين والاشتراكيين ..وفى الوقت المناسب .."فى خلال شهر او شهرين على الارجح "سيتم القضاء على الثورة "توتالى "وبمباركة الشعب اللى شجع ونزل واحتفل فى التحرير بخلع مبارك....
الشعب المصرى مش اخوانجى ولا سلفى ولا ليبرالى ولا اشتراكى ..الشعب المصرى ..عايز يعيش فى حرية فى حياته ويعبد ربنا بطريقته وياكل لقمته بعدالة وكرامة من غير فساد ولا قهر ..الشعب المصرى عايز يعلم ولاده تعليم محترم ويعالجهم صح لما يعيوا يشوف ولاده بيكبروا فى بلد تراعى كرامته وانسانيته ويفرح بولاده لما يلاقوا شغل محترم ويعرف يجوزهم ويلعب مع احفاده فى بلد ميموتش فيها الشباب فدا الكراسى او ناس متستحقش.....

فى ال18 يوم اتفقوا على مجلس رئاسى يضم البرادعى وحسام عيسى وناس محترمة تانية طلع اللى يقول انا مش موافق عشان هو مش فيه زى الصباحى ولما ابتدى البرادعى يشتغل يطلع حمدى قنديل يقول انا غيبت الناس لما قولتلهم يمشوا ورا البرادعى ..وفى الاستفتاء على التعديلات الدستورية كل الاشتراكيين راحوا قالوا نعم ..انا مش بنتقد تجار الدين اللى مش بيفكروا بعقل لكن الانتقاد يتقال للنشطاء اللى معرفوش يتوحدوا حتى 6 ابريل انقسمت و النخبة كل واحد شايف ارائه من وجهة نظره حتى صباحى رفض يكون نائب لابو الفتوح اللى رفض هو كمان يبقى نائب للبرادعى اللى اتخذل من كل القوى السياسية والمثقفين والنشطا المصريين "ثورة من غير قائد ومن غير قوى متحدة = ثورة فاشلة" ولا عزاء ليكى يا مصر

اسفة

كلنا كنا بنحلم بوطن حر قوى جميل خالى من الفساد فيه عدل لكل الناس ,الفقير يقدر يعلم ولاده ويقدر يعالجهم وهو رافع راسه ومن غير ما يلف ويدور على المستشفيات اللى مبيردوش يعالجوه عشان معهوش التمن وفى الاخر يشوف ابنه يموت قدامه ,كنا بنحلم بوطن الفقير فيه يلاقى بيت نظيف مش عيشة زى الحيوانات ويشرب مياه نضيفة مش ميا ه مجارى ,كنا بنحلم بوطن يضم ولاده مش يسيبهم يموتوا قى البحر وعلى شواطىء البلاد المتقدمة ,كنا بنحلم بوطن يهتم بكرمة اولاده ومنلقيش 1200 واحد يغرق ولا ياكله السمك ويطلع المسئول يضحك ويهزر او بوطن ما يمتش فيه 400 بنى آدم محروقين فى قطر من غير منفذ يخرجهم منه ومفيش حد يتعاقب والتهمة تترمى على اللى مات كنا بنحلم بوطن اولاده يحبوا بعض مش المسئولين فيه ينشروا الجهل عشان يفرقوا بين ولاده ..العيب مكنش فينا عشان حلمنا بمصر جميلة ولا بالشباب اللى نزل يطالب بحرية وعدالة اجتماعية ..العيب عيب المسئول اللى نهب وسرق وقتل وفرق عشان يحمى الكرسى ويحمى نفسه..العيب عيب المستغل الفاشى اللى باع دم اللى مات برضه عشان كرسى وانتصار اقرب انه يزول من انه يستمر ..بس فى الاخر عندى كلمة واحدة الحلم مش ممكن يموت ايماننا بوطن جميل حيتحقق بس نتعلم من غلطنا..انا بقول الكلام ده وانا اسفة انى اروح انتخب عمر سليمان عشان بلدى متقعش فى الظلام على ايد نظام فاشى..

رئيس اخوانجى

بيقولك الاخوان مكانوش عايزين يرشحوا حد للرياسة بس المجلس العسكرى اداهم برلمان من غير صلاحيات و مش راضى يخليهم يشكلوا حكومة!!!! هو الاساتذة مبيعرفوش يقروا؟ هو من قبل ما يدخلوا الانتخابات البرلمانية معرفوش من التعديلات الدستورية اللى راحوا بصموا عليها بنعم ان البرلمان زى قلته من دستور 71 ؟ ولا ريقهم جرى لما العسكرى قالهم قولوا اه وخدوا البرلمان؟ بلاش التعديلات.. من الاعلان الدستورى مكنوش فهموا ان برضه البرلمان ملوش صلاحية وان كل حاجة فى ايد العسكرى زى ما كانت فى ايد مبارك ولا برضه كانت سكينة السلطة سرقاهم؟ وبعدين احنا حنضحك على بعض لولاش الانتهاكات الصريحة من اول عمل حزب دينى لغاية السكر والزيت والدعاية اللى قدام اللجان واللى جوه اللجان بما لا يخالف الشرع "شرع الاخوان" ورمى المنافسين اللى قدامهم بالكفر واستغلال جهل بعض فئات الشعب كانوا اخدوا الكراسى اللى هما قاعدين عليها؟ هو الاساتذه ناموا وصحيوا فجأة لقوا نفسهم من غير صلاحيات؟؟ ده حتى مانتوش عارفين تغيروا لايحة البرلمان ..فرقعتولنا بالونة ان العسكرى واقف ضدكم وحتنزلوا مليونية!!! فهمتوا بعدها ان كل الناس ضدكم واتريقوا عليكم زى ما خونتوهم قبل كده وقلتم عليهم عملا ومرتزقة وكفرة ..اتقلبتم دلوقتى على الصفقة اللى بيعتم فيها مصلحة مصر عشان مصلحتكم ..لكن التاريخ مش بيرحم  ...

التصعيد

التصعيد

يوجد تصعيد غير مبرر الان من كل اجهزة الدولة.......

التصعيد يكمن فى تأجيل المحاكمات لرموز الفساد من قتل المتظاهرين و الثوار فى كل القضايا دفعة واحدة.
عدم اعطاء الفرصة لاهالى الشهداء لمشاهدة او حضور محاكمة من قتلوا ابناءهم .
اذلال اسر الشهداء فى دفن اولادهم كما حدث مع الشهيد محمود قطب وتعنت ادارة المستشفى فى خروج جثمانه حتى يتم التنازل عن القضية.
الاصرار على عدم ملاحقة الهاربين بأموالنا الى الخارج وعدم تقديم ملفات فساد قوية لاسترجاعهم.
الاصرار على عدم محاسبةالكبار بل والنصب على اهالى الشهداء باسم الدين من اجل التصالح وتبرئة القاتل واخذ بعض الأموال مقابل التنازل عن محاضر القتل.
عدم محاسبة المخلوع و اولاده حتى بما ارتضيناه على مضض وهو محاسبتهم ماليا وليس سياسيا.

وتأتى البرأة او الافراج بكفالة لكل رموز القتل والفساد لتتوج المشهد....

وفى نفس الاوقات تأتى الخدع والمؤامرات للزج بالثوار فى مواجهة الداخلية التى تظهر بالمدافع عن نفسها ضد "البلطجية" ،فهم يقذفونها بالحجارة "ويرمون عليها الملوتوف" "وهى تتبع سياسة ضبط النفس!!!!"........."ويريدون اشعال مرافق الدولة وبث الفوضى فى الشوارع ......"

وينتهى الامر بالقبض على الثوار وزجهم فى السجون الحربية والتعامل معهم وكأنهم خانوا الوطن فيقدموا، وهم المدنيين، الى محاكمات عسكرية عاجلة تحكم عليهم بما لم تحكم به المحاكم المدنية على الفاسدين.....

كل هذا التصعيد يجعل الثوار متشبعين بحرقة الدم والاحساس المهين بضياع الحلم بل وضياع الثورة السلمية....وينتهى المطاف الى جعل البعض منهم ،من لا يستطيع السيطرة على غضبه، الى الدعوة الى العنف او استخدامه بالفعل  وهذا يقود الى شىء خطير لانه سيعطى المبرر او الشرعية فى استخدام عنف مضاد سواء بالقتل او بالقبض على الثوار من قبل الشرطة او المجلس  وسيقوم الاخير بشد الزمام ليقول هنا تكمن الفوضى لتأجيل ترك السلطة حتى تنتهى هذه الفوضى وهذا ما نخشاه جميعا....

يجب علينا عدم الانصياع لهذا التصعيد باستخدام العنف مهما حدث فهو ما سيعطى الذريعة لاكتمال السيناريو المتفق عليه وتبرير ان هذه الثورة هى فى النهاية من مصادر خارجية اعطت التمويل للمصريين بل وساعدتهم بالوجود اثناء الثورة امثال الجاسوس الايرانى والجاسوس الاسرائيلى...لهدم مصر.

وفى النهاية يأتى المجلس ليتقلد الحكم للابد، بعد ان يشعر اغلب المصريين بالفوضى، وكأنه هو الحارس الذى يحمى الاستقرار....

أرجو ان نلتزم جميعا بسلمية الثورة يوم 8 يوليو والحفاظ على هدوء اعصابنا حتى لا نخسر ما بدأناه فما تم ما هو الاخطوة فى مشوار طويل......


يا رب احفظ مصر من الخونة والمتربصين بها.......
يا رب ليس لنا غيرك وليس لنا الا هذا الوطن.....يا رب.....